حاسب قبل ما تناسب

عدد الرسائل : 336 تاريخ التسجيل : 27/01/2009

يا أستاذ : حاسب . قبل ما تناسب

عندما يقبل أى فرد على الزواج و تكوين بيت و أسرة جديدة يحلم و يتمنى أن يحقق له الزواج السعادة و الإ ستقرار و أن تتغير ظروف حياته إلى الأفضل و لكى تتحقق كل الاشياء المنشودة من الزواج هل يتوقف ذلك على صفات و شخصية الزوجين فقط أم تتأثر علاقة زواجهما بصفات و ظروف أقاربهما ؟!

و لذلك توجهت ليلة العمر بالسؤال لبعض الأزواج و بعض الشباب المقبلين على الزواج :
* هل ترفض الإرتباط بشخص بسبب ظروف و صفات أقاربه ؟

و كانت هذه بعض إجاباتهم :* العرق دساس

يقول رائد كامل تاجر :

- أنا شايف إن النسب شئ مهم جداً لأنه بيدوم مع الإنسان طوال حياته علشان كده لازم الواحد يدقق فى إختياره حتى المثل بيقول : ( حاسب قبل ما تناسب ) و أنا عارف إن كل واحد يتحمل مسئولية نفسه و بيبقى له شخصيته المختلفة بس إزاي يعنى لما أحب أرتبط بواحدة أفصلها عن أهلها و عن صفاتهم و هى هتبقى متربية طول عمرها فى وسطهم على طريقتهم و سلوكهم و لازم الواحد يضع فى إعتباره أن ظروف الأسرة بيكون لها أثر فى تكوين شخصية كل واحد فينا و أنا مش بقصد أن الواحد لازم يتجوز واحدة من عيلة كبيرة و كل أهلها ذوو مراكز اجتماعية مرموقة أو ذوي مستوى مادى معين لكن على الأقل يكون أهلها أناس محترمين ذوى أخلاق حميدة و لأن قرار الزواج قرار مصيرى أوصانا رسول الله صلى الله عليه وسلم قائلاً : ( تخيروا لنطفكم .. لأن العرق دساس ) .* أولادى أولى

تقول نرمين عادل / محاسبة

- أنا كنت فاكرة إن الزواج علاقة بين اثنين و بس و كنت مقتنعة جداً بالفكرة دى و فعلاً لما تقدم زوجى لطلب الزواج منى . أنا اهتميت بشخصيته و ظروفه على حدة و لأنه كان شخصية مناسبة و إمكانياته كانت معقولة وافقت على إتمام الزواج رغم أنه له أخ مشاغب و كل علاقاته و حياته مليانة مشاكل و غير مستقرة بالعربى ما بيعمرش فى وظيفة .. وأنا لما اتجوزت كنت فاكرة إن حياتنا هتبقى بعيدة عن مشاكل أخيه لكن للأسف كل مشكلة بيعملها أخوه لازم جوزى يتدخل و يحلها بحجة أنه مش ممكن يتخلى عنه و ساعات حل المشاكل دى بيكون على حساب بيتنا خصوصاً لو كان الحل بيتطلب فلوس بيكون أخوه سالفها أو كاتب بيها شيكات على نفسه و ده بيكلفنا كتير بالذمة مش بيته و أولادى أولى بالفلوس دى ؟!* حاجة تزهق

يقول محمد أبو زيد / باحث

- أنا شخص هادئ الطباع و ليس لى علاقات كثيرة و لما فكرت أتجوز حبيت أرتبط بإنسانة علاقاتها محدودة و فعلاً ربنا وفقنى و ارتبطت بإنسانة علاقاتها بسيطة يمكن أكتر منى لكن المشكلة التى ظهرت بعد الزواج أن كان لها أقارب كتير فى مختلف المحافظات و كل ما حد من أقاربها يجى القاهرة يقضى مصلحة أو يزور حماتى لازم اعزمه أنا كمان عشان ما ينفعشى يجى حد فى بيتنا المشكلة إن عددهم كبير دائماً فى الصيف ما بيعديش أسبوع من غير ما يكون ضيوف عندنا و الموضوع ده بصراحة بيضايقنى و بيعطلنى عن شغلى و مراتى تقولى معلش دول مهما كان أهلى يعنى أعمل إه و إزاى ما أرحبش بيهم فى بيتى لكن مش عايز أقولك إن كتير الأقارب حاجة تزهق ، و المفروض الواحد كان لازم يحاسب فعلاً !!* كفينا شرها

يقول ثروت فوزى - ترزى

أنا من وجهة نظرى ان صوابع اليد مش زى بعضها و مش ممكن أخد حد بذنب أى حد تانى و أنا شخصياً لما اتقدمت لخطبة مراتى كانت أختها الأكبر منها صعبة قوى و بتدخل فى كل حاجة فى حياتنا و فى كل ترتيبات الخطوبة و بعدها فى ترتيبات الزواج و بصراحة الموضوع ده سبب لى بعض التردد و فكرت كثيراً أكمل و أتزوجها و لا أنسحب فى هدوء و كان الحد الفاصل فى شخصية مراتى شعرت أنها مختلفة تماماً عن شخصية أختها و لها فعلاً طبع آخر و لما تكلمنا معاً حطينا سوا الخطوط العريضة لحياتنا و لقيتها هى كمان بتضايق من تصرفات أختها و قالت لى معلش استحمل تصرفاتها لغاية ما نتجوز و أنا أوعدك إنى مش حديها فرصة تتدخل فى حياتنا بعد الجواز و بصراحة لأنى كنت شايف بعينى إن شخصية مراتى مختلفة تماماً عن شخصية أختها و حسيت بالصدق فى علاقتنا أتممت الزواج منها و الحمد لله وفت بكل وعودها لى .. لكن أختها برضه اللى فيها فيها .. دايماً بتدور على المشاكل بمنكاش و ربنا يكفينا شرها .اخواتها السبب

يقول صلاح عبد المنعم - موظف

* بصراحة اللى ما لوش خير فى أهله ما لوش خير فى حد علشان كده مش معقول لما تجوز واحدة هاخدها من عيلتها و أقولها ما تعرفيهمش تانى و أنا شخصياً مريت بتجربة ارتبطت بزميلتى فى العمل و كانت على خلق و كنا متفاهمين و متفهمين فى أشياء كثيرة و لكن حين تقدمت لطلب يدها عرفت أن لها اخوات كتير لدرجة إنى ما عرفتش أعدهم كويس أنا كل اللى فاكره إنى شفت جيش من الأطفال بأعمار مختلفة و ساعتها افتكرت إزاى حتجوز واحدة ليها العدد الهائل ده من الأخوات و ابقى مطالب إنى أقف معهم فى مشاكلهم و اجامل فى مناسباتهم خصوصاً أننى موظف على أد حالى و إنت شايف الزمن اللى إحنا فيه عامل إزاى و وقتها شعرت انه ضرب من الجنون لو اتممت زواجى منها للأسف خرجت من حياتها رغم إرتباطى بها لأنى تخيلت صورة مستقبلية لحياتنا معاً بعد الجواز .. و للأسف انفصالنا كان بسبب ظروف عائلتها و ليس عيباً فى شخصيتها هى !!ربنا يستر

- انا تعرفت بزميل لى فى الجامعة و بصراحة كان إنساناً ملتزماً و ذا شخصية قوية اعتمد على نفسه و كان يعمل أثناء الدراسة و كنت فخورة به .. و بعد التخرج مباشرة كانت إمكانياته المادية تسمح أن يتقدم لطلب يدى فعلاً تمت الخطوبة و لكن للأسف أثناء فترة الخطوبة اكتشفت أن له أقارب كثيرة من عائلته أصماء و أنا بصراحة ما كانش عندى مشكلة أن أُتمم الزواج منه لأنه ليس له ذنب فى الموضوع ده و لكن والدى أصر على عدم إتمام الزواج و اعتمد فى الرفض ده على أنى ليه أعرض نفسى أن يكون لى أولاد منه يمكن أن يكونوا مصابين بنفس المرض مع أن كل شئ بإرادة الله و لكن والدى شاف إن الواحد مش مفروض يحط نفسه قدام القطار و يقول ربنا يستر !خال أولادى

يقول - أشرف كمال - خريج فنون جميلة

أنا رأيى إن الجواز مش ارتباط زوج بزوجته لا الجواز ارتباط عائلتين ببعض و أن كل فرد فى العائلتين ممكن يكون له تأثير على الزواج سوى بالإيجاب أو السلب علشان كده المفروض فى الجواز يكون فيه قبول من ناحية العائلتين زى الزوج و يمكن أهم و كمان الواحد لازم ياخد باله أن كل فرد من العائلتين حيكون اقرب الناس لأولاده سواء عم أو خال و أن شخصياتهم هتأثر عليهم و يكونوا قدوة لهم عشان كده لازم تكون قدوة حسنة أنا مثلاً بعد ما خطبت إنسانة جميلة جداً فى كل شئ اكتشفت أن أخاها له سابقة و كان مسجوناً بعد اكتشافى الموضوع ده و بدون تردد تركتها لأن اخاها هيكون خال أولادى فى المستقبل .كله حلال

نقول منى فاروق - خريجة ألسن

* أنا فعلاً مريت بتجربة خطوبة و لم أُتمم الزواج من خطيبى لأنه أثناء الخطوبة و لما تعمقت فى العلاقة مع أسرته وجدتهم جميعاً غير متدينين بما فيهم هو و هذا الأمر فى البداية لم يقلقنى لأن مش شرط يكون الإنسان متديناً بدرجة كبيرة لكن على الأقل بيصلى و يعرف عن دينه اللى يخليه إنسان صالح و قريب من ربه و يكون حريصاً فى معاملاته ألا يُغضب ربنا و أنا حاولت أن أحدثه عن أهمية القرب من الله و لكنه لم يستجب لى و ساعتها شعرت أنى لو أتممت الزواج من هذا الشاب و خصوصاً أن كل عائلته تحمل نفس الصفة سوف أكون فى يد شخص غير أمين على و أنه مش حيعاملنى بما يرضى الله خصوصاً أنه فى فترة الخطوبة كنا كتير بنختلف فى قرارات أنا أبقى شايفة إن الموضوع ده حرام أو اخلاقنا الدينية لا تسمح به و هو على طول الخط شايف إن كل شئ حلال و جايز !طماعين

تقول منى على - محامية

* أنا تجوزت من محام زميلى و فى أول حياتنا كنا على أد حالنا ففكر والدى تقديم يد المساعدة لنا و فعلاً ساعدنا أن نفتح مكتب المحاماه الخاص بينا و فعلاً وقفت بجوار زوجى يدى بيده إلى أن وفقنا الله و المكتب حقق نجاحاً كبيراً و من هنا ظهرت المشكلة عندما شعر أهل زوجى أن أحوالنا المالية مستقرة و مستوانا المادى زاد فبدأوا يطلبون من زوجى طلبات مُبالغ فيها و جوزى طبعاً كان بيلبيها بدون تردد و ده كان شئ بيغيظنى لأنى كنت بحس إن تعبى و شغلى كله بيستفيد بيه أهله و طبعاً أنا حبيتش أقول له ده شغلى او أن والدى هو الذى ساعدنا فى البداية عشان ما أجرحش احساسه لأن كان المفروض أهله هما اللى يكون عندهم ذوق و ما يستكثروش نجاحنا علينا .. و كان أوقات كتير دمى بيتحرق مش منه .. لكن من أهله الطماعين .

و فى النهاية ننصح كل إنسان مقبلاً على الزواج أن يتأنى و يدقق قدر الإمكان فى الإختيار لأن قرار الزواج ليس بالقرار السهل فهو أهم قرار فى حياة أى إنسان منا فإما أن يضعه فى الطريق الصحيح و إما أن يقضى على أحلامه و يُفقده الرغبة فى الحياه .

جريدة ليلة العمر king

فعلاً حاسب قبل ما تناسب
موضوع مهم ويستحق القراءة بالنسبة لكل من يفكر فى الزواج